ဖိုးသူတော်သို့ စိန်ခေါ်သံ

စကားကငယ်၊ နားကကျယ်၊ နားဝယ်မနှံ့ ဖြစ်တတ်၏။

စကားကထည်၊ နားကငယ်၊ နားဝယ်မဆံ့ ဖြစ်ချေ၏။

ဝိုးတ၀ါးမှတ်မိနေပါသေးသည်။ ကိုယ်ရင်ဘ၀ ဦးဥတ်ကျော်(ရှင်ဥတ္တမကျော် လူပျံတော်)ရဲ့ သာသန၀ုဍ္ဎိကရဓမ္မကထိကသင်တန်း အရူးအနှမ်းအပြောခံကာ သွားတက်ခဲ့တာ။ မစိုးရိမ်တိုက်သစ်မှ ဘုရားကြီး ညောင်ကန်ကျောင်းတိုက်အနီး သီတာအေးရပ်ကွက်သို့ တစ်ပတ်တစ်ခါ သွားသွားတက်ရသည်။

(ကိုရင်ဘ၀ သာသန၀ုဍ္ဎိကရဓမ္မကထိကသင်တန်း ဒုတိယဆင့် ၀င်ရောက်ယှဉ်ပြိုင်စဉ်)

ထိုစဉ်က မန္တလေးတိုင်း ကျောင်းထိုင်ဘုန်းကြီးသင်တန်းကျောင်း ကျောင်းအုပ်ဆရာတော်ကလည်း စကားပြောနည်း လာသင်ပေးသည်။ ယခုထိ မှတ်မိနေသေးသည်မှာ အထက်ပါ လင်္ကာစာကြောင်းလေးများသာ။ သုတနည်းသူများနှင့် တွေ့လျှင် အထူးသဖြင့် တောသူတောင်သား စားဖတ်အားနည်းသူများကို စကားလုံးတွေ အကျယ်ချဲ့ပြီး စကားကြီးစကားကျယ် မပြောရန် ဖြစ်သည်။ သုတများသူများကိုမူ စကားလုံးအသုံးအနှုန်းနှင့် လေယူလေသိမ်းကအစဆင်ခြင်ပြီး လူတန်းစားအလိုက် အကြောင်းအရာကိုပါ ရွေးချယ်ပြောဆိုတတ်ရမည်ဟု မှတ်သားခဲ့ရသည်။ ယခုခေတ်တွင် လူနေမှုအဆင့်အတန်း တဖြည်းဖြည်း မြင့်တက်လာနေသည့်အတွက် ရဟန်းတော်များအဖို့ မိမိတို့၏ စကားများ အရာဝင်ရေး ကြားမြင်သုတကိုမြှင့်ပေးနိုင်မှ တော်ကာကျပေတော့မည်။ သို့သော် စကားနှင့်နား အပေးအယူ ညီမျှရန်ကား သတိထားသင့်ပေသည်။

စကားနှင့်နား မကိုက်ညီလျှင် ပြောသူရောနားထောင်သူပါ အကျိုးမဲ့ဖြစ်ရတတ်သည်။ ဆရာများထံမှ ကြားခဲ့ရဖူးပါသည် ဖိုးသူတော်လောက် အရာမရောက်ခဲ့သည့် ပညာရှင်မထေရ်ကြီးအကြောင်း။

ကျောင်းအမကြီးတစ်ဦးသည် ကျောင်းကိုနေ့စဉ်မပြတ် ဆွမ်းဝတ်ပို့လေ့ရှိ၏။ ဆရာတော်ကြီးထံ ဆွမ်းအုပ်ကိုကပ်ပြီး ဆွမ်းစားကျောင်းမှာ ကိုယ်တိုင် လဲလှယ်ထည့်ခဲ့ပြီးမှ ပြန်လေ့ရှိသည်။ ကျောင်းအမကြီး နေ့စဉ်နှင့်အမျှ မြင်တွေ့နေရသော ဆွမ်းစားကျောင်းအတက် စောင်းတန်းတစ်ဖက်မှာ ချိတ်ဆွဲထားသည့် ပန်းချီးကားကြီးတစ်ချပ် ရှိသည်။ သုမေဓာဗျာဒိတ်ယူခန်း ပန်းချီကားချပ် ဖြစ်သည်။ ကျောင်းအမကြီး၏ စာပေအသိမှာ မရှိသလောက်ဖြစ်ဟန်တူသည်။ ပန်းချီကားကြီးကိုကြည့်ပြီး နောက်ခံပုံဝတ္ထုတော့ ရှိလိမ့်မည်ဟု တွေးဆမိလေသည်။ ပန်းချီကား၏ နောက်ခံဇာတ်ကြောင်းကို သိချင်နေခဲ့သည်။ ဇာတ်ကောင်တွေကို စိတ်ဝင်စားနေခဲ့သည်။ သူများတွေကိုလည်း မမေးချင်၊ မေးလျှင် ကျောင်းအမ သိက္ခာကျမည်ပေါ့။ ဆရာတော်ကြီးကို မေးလျှောက်ကြည့်ရမှာလည်း မ၀ံ့မရဲမို့ မျိုသိပ်လို့သာ နေခဲ့ရရှာသည်။ တစ်နေ့တော့ဖြင့် အရဲစွန့်၍ မေးအုံးမည်ဟုကား စိတ်ထဲကမှန်းထားသည်။ သည်လိုနှင့် ရက်လနှစ်ပေါင်း ကြာညောင်းလာခဲ့သော်လည်း သိလိုစိတ် ကျိတ်အခဲကိုကား မဖြေဖျောက်နိုင်ခဲ့။

တစ်နေ့တွင် ဆွမ်းစားကျောင်းအတက် တံမြက်စီလှည်းနေသော ဖိုးသူတော်ကို တီးတိုးမေးလိုက်မိလေသည်။

"ဦးသူတော် ဒီပန်းချီကားအကြောင်း သိရင် ကျောင်းအမကြီးကို ရှင်းပြပေးစမ်းပါ"။ " ကျောင်းအမကြီးကလဲ သိတာပေါ့။ အဲဒါ ဟိုးရှေးတုန်းက ထန်းလျက်ခိုးစားတဲ့ ကိုယ်တော်ကို ကျောင်းထိုင်ဘုန်းကြီးနဲ့ ကျန်တဲ့ကိုယ်တော်တွေက ဒဏ်ခတ်တဲ့အနေနဲ့ တက်နင်းမလို့လုပ်နေတာ။ ဘေးနားမှာပန်းတွေကိုင်ပြီး ရပ်နေတဲ့ ဒကာမကြီးက အဲဒီအချိန်တုန်းက ကျောင်းအမပေါ့။ ကျောင်းအမက ဒဏ်ခတ်ခံရမယ့်ကိုယ်တော်ကိုကြည့်ပြီး သနားလို့ ဖော့ဖော့နင်းဖို့ တောင်းပန်နေတာလေ" ဟု ပညာကျော်ဦးသူတော်က ရှင်းပြလိုက်ရာ ကျောင်းအမကြီးခမျာ မျက်ရည်များပင် ကျရှာလေသည်။ ၀မ်းလည်းသာ စိတ်လည်းဆိုးရသည်။ ပန်ချီကားအကြောင်း သိသွားရ၍ ၀မ်းသာ၏။ ဒီလောက်ပြောပြရလွယ်တာကို ဆရာတော်ကြီးက တစ်ခါမျှ မပြောပြခဲ့၍ စိတ်ဆိုးလေ၏။ ကျောင်းလည်းလှူ သူနေ့စဉ်လည်းဆွမ်းပို့နေသည်ကိုမျှ  ဒါလေးတောင်အလိုက်သိ ရှင်းမပြရကောင်းလားဟု မကျေမနပ်ဖြစ်လေသည်။ ကျောင်းအမကြီး သူ၏မကျေနပ်ချက်ကို ထိန်းရခက်လေပြီ။ ခြေလှမ်းများက ဆရာတော်သီတင်းသုံးရာ ကျောင်းဆောင်သို့ သုတ်ခြေတင်လေပြီ။ ရင်ဖွင့်တော့မည်။ ဆရာတော်ကို နေနိုင်သူကြီးအဖြစ် အပြစ်ဖို့တော့မည်။ စိတ်ထဲက အခဲမကျေမှုသည် ဘာကိုမှ ဂရုမပြုနိုင်တော့ဟန်နှင့်။ သို့သော် ဆရာတော်ရှေ့ရောက်၍ “ဘာတုန်း ဒကာမကြီး” အသံကြားလိုက်ရသည်နှင့် ကြောက်စိတ်က ၀င်လာပြန်တော့သည်။ မထူးတော့ပြီ လျှောက်တော့မည်ဟု အားခဲကာ အစချီလိုက်သည် “တပည့်တော်မ ဟိုဆွမ်းစားကျောင်း အတက်က ပန်းချီပုံအကြောင်း သိချင်နေတာ ကြာပြီဘုရား...အဲဒါ..” ။ ကျောင်းအမကြီးက တစ်ခါမှ မပြောပြလို့ သူမကျေနပ်တဲ့အကြောင်း၊ ဖိုးသူတော် ရှင်းပြလို့ သိပြီဆိုတဲ့အကြောင်းများဖြင့် ဆရာတော်ကြီးကို အပြစ်တင်ရန် စကားပျိုးခြင်းဖြစ်သည်။ သို့ရာတွင် ဆရာရှင်က စကားမြွက်ဟလာ၍ ရပ်လိုက်ရသည်။ “အော် ဒကာမကြီး မသိရင် အစောက လာမေးလို့ရတာပဲ၊ ဒကာမကြီးသိတယ်ထင်လို့ ဘုန်းကြီးက ရှင်းမပြတာ။ ကဲ ပြောပြမယ် သေချာနားထောင်။ အဲဒီပန်းချီကားက သုမေဓာဗျာဒိတ်ခံယူခန်းကို ပုံဖော်ထားတာပဲ ဒကာမကြီး။ အခုဘုန်းကြီးတို့ ကမ္ဘာကနေ ပြန်ရေတွက်ရင် ကမ္ဘာတစ်သိန်းအလွန်ရှိတဲ့ လေးသင်္ချေလောက်က ဘုရားအလောင်းတော်ဟာ သုမေဓာအမည်ရှိတဲ့ ရသေ့တစ်ပါး ဖြစ်ခဲ့တယ် ဒကာမကြီး...”ဟု အစချီကာ ဘုရားလောင်း သုမေဓာရှင်ရသေ့ ဒီပင်္ကရာမြတ်စွာဘုရား ခြေတော်ရင်းမှာဝပ်စင်း တံတားခင်းလျက် ဘုရားဖြစ်မည့်သူဟူသည့် နိယတဗျာဒိတ် ခံယူခန်းကို စာသံပေသံဖြင့် ကျမ်းဂန်လာအတိုင်း အကျယ်ချဲ့ကာ မိန့်ပါလေတော့သည်။ ကျောင်းအမကြီးမှာ နားသာထောင်နေရသည် စိတ်မပါ။ လေးသင်္ချေ , ကမ္ဘာတစ်သိန်း စကားလုံးတွေကြားရတည်းက နားမလည်ခဲ့ခြင်း ဖြစ်သည်။ ထမသွားရဲ၍သာ ထိုင်နေရသည်။ စိတ်က ထပြန်ချင်နေပြီ။ ဆရာတော်ကြီးစကားတွေ နားထဲမရောက်၊ ကျောင်းအမကြီးစိတ်က ထန်းလျက်ခိုးစားသည့်အတွက် ဒဏ်ခတ်သည့်ပုံပြင်ကိုသာ တွေးမြင်နေလေသည်။ ဆရာတော်ကြီးက ရှင်းပြအပြီးတွင် “ကဲ နားလည်သွားပြီလား ဒကာမကြီး” ဟုမေးရာ “ နားမလည်ဘူး ဘုရား။ ဘာတွေပြောနေမှန်းမသိဘူး။ ဘုန်းကြီးပြောတာ ရှုပ်နေတာပဲ။ ဖိုးသူတော်လောက်တောင် မရှင်းဘူး။” ဟု ပြောပြောဆိုဆိုနှင့် ကန်တော့ကာ ထိုင်ရာမှထပြန်သွားလေသည်။

ထို့အတူပင် ယခင်ယခု အခါများမှာလည်း စကားနှင့်နား လွဲသွားရသည်များ တွေ့ရကြုံရတတ်ပေသည်။ တစ်ခါက မန္တလေးမှာ မဟာစည်ဆရာတော်ဘုရားကြီး နှင့် ဦးလှသိန်းတို့ ရှေ့ဆင့်နောက်ဆင့် တရားဟောကြရာ တရားပွဲအပြီး အပြန်လမ်းတွင် မိန်းကလေးတစ်ယောက်က “အရင်ဟောတဲ့ ဆရာတော်ကြီးက ဘာတွေပြောနေမှန်းလဲ မသိဘူး၊ တရားမဟောဘဲ စကားတွေပဲလျှောက်ပြောနေတာ အကြာကြီးပဲ၊ ဦးလှသိန်းလို ဟောတာလဲမဟုတ်ဘူး၊ ဦးလှသိန်းဟောတဲ့ တရားကမှ နားထောင်လို့ကောင်းတာ” ဟု သူ့အမေကို ပြောနေသံ ကြားခဲ့ရကြောင်း အရှင်ကုလိသ(ရွှေစည်)က “ကျေးဇူးရှင်မဟာစည်ဆရာတော်ဘုရားကြီး ဖြတ်သန်းလာခဲ့သော သာသနာခရီးတလျှောက်” စာအုပ်တွင် ဖွင့်ဟခဲ့သည်။ ယခုအခါတွင်လည်း သည်ကဲ့သို့ စကားများ ကြားရနိုင်ပါသည်။ ရဟန်းများအနေဖြင့်လည်း ခေတ်နှင့်လျှော်ညီစွာ လူတို့နားနှင့်ရဟန်းစကား စကားနှင့်နား အပေါက်အလမ်းတည့်အောင် ပြောဆိုနိုင်ပါမှ သာသနာအဆိုအမိန့်များကို လက်ဆင့်ကမ်းသောအခါ လူတို့နားလည်လက်ခံနိုင်မည်ဖြစ်သည်။ ထို့ကြောင့် မျက်စိကိုဖွင့် နားကိုစွင့်ထားရမည်။ ပညာကို စွမ်းနိုင်သမျှ ဆည်းပူးရမည်။ ပညာရှာခြင်းဖြင့်သာ အချိန်ကိုတန်ဖိုးရှိရှိ အသုံးချထားပါမှ လောကကြီးက ကျေကျေနပ်နပ် လက်ခံထားပေလိမ့်မည်။ သို့မဟုတ်လျှင် လူတို့သည် ကျောင်းအမကြီးကဲ့သို့ ဖိုးသူတော်ကိုပင် အဟုတ်ထင်နေကြပေတော့မည်တည့်။

စကားပြောကောင်းသူ ဖြစ်မလာနိုင်စေကာမူ စကားနှင့်နား လွဲချော်မှုများ နည်းပါးရလေအောင် သာသနာ့တက္ကသိုလ်တွင် မြန်မာစာသင်ယူစဉ်က လေ့လာမှတ်သားခဲ့ရသည့် ဦးတင်အောင်ရေးသားသော “စကားလိမ္မာ အောင်မြင်ရာ” စာအုပ်မှ စကားပြောကောင်းသူတို့၏ အရည်အသွေးများကို မျှဝေလိုက်ပါသည်။

“စကားပြောကောင်းသူတို့၏ အရည်အသွေး (၁၄)ချက်”
(၁) သူများစကားပြောသည်ကို ငြိမ်သက်စွာ နားထောင်ခြင်း
(၂) ဝေါဟာရအသုံး ကြွယ်ဝခြင်း
(၃) သာယာချေငံစွာ ပြောဆိုတတ်ခြင်း
(၄) မိတ်ဆွေကဲ့သို့ ရင်းနှီးစွာ ပြောဆိုတတ်ခြင်း
(၅) နားထောင်သူအား ပြောဆိုခွင့်ပေးခြင်း
(၆) အချက်အလက်တို့ကို စည်းလုံးမှုရှိအောင် ပြောဆိုတတ်ခြင်း
(၇) သဒ္ဒါမှန်ကန်အောင် ပြောဆိုတတ်ခြင်း
(၈) ရယ်ရွှင်ဖွယ် ကြားညှပ်၍ ပြောဆိုတတ်ခြင်း
(၉) တိုတိုနှင့်လိုရင်း ပြောတတ်ခြင်း
(၁၀) အေးဆေးစွာ ပြောတတ်ခြင်း
(၁၁) စိတ်ထက်သန်စွာ ပြောတတ်ခြင်း
(၁၂) ရပ်ဆိုင်းသင့်သည့်အခါ ရပ်ဆိုင်း၍ ပြောတတ်ခြင်း
(၁၃) စိတ်ဝင်စားဖွယ်ကောင်းသောစကားများ ပြောတတ်ခြင်း
(၁၄) အကူအညီပေးတတ်သော အကြံဥာဏ်များ, အပြုသဘောဆောင်သော အကြံဥာဏ်များ ပေးတတ်ခြင်း တို့ဖြစ်သည်။

ဆရာတော်ကြီးလိုတတ်၍ ဖိုးသူတော်လိုရှင်းနိုင်ကြပါစေ

မောင်ပဉ္စင်း